Samichlaus, ojeminee,
etz hani gad mit Schreckä gseh,
dass i din Tag verpasst ha,
do getz kä Sorry - basta!
Hett mi söle ade Nase neh,
und of em Natel s Datum gseh,
denn wär mer da etz nöd passiert,
und weder du no i verwirrt!
Sicher häsch gwartet wie verrockt,
bis mis Spröchi dini Bude rockt.
Anderi hend au gueti Spröchli gwösst,
und hend di sogär of d Bagge küsst.
Zom Glück bisch fäng öberall - e Woche lang,
mit Last-Christmas-Lutsprecher-Gsang,
begleitet ide Läde und of de Gass,
häsch echt du so no de Gspass?
Me cha go wommer will,
der, Chlaus werts glob nöd gad zvill,
Geduldig hocksch im Lade dei,
und Gofe hocked der of d Bei.
Is Turne chunnsch und au id Schuel,
öberall häts för di en Stuehl.
Nor, Chlaus, säg mer wa söli mache,
wenn d Gofe fröget derig Sache
wie "wieso gseht er hüt denn anderscht us
als gescht woner hä isch cho is Hus?
Hüt hät er au en andere Huet,
und gseh tuet er hüt au nöd guet?
E Brille hät er sletscht mol ka,
wa hät er denn för Stiefel a?"
Im Turne, ide Schuel und of de Strosse,
d Gofe merked alli Nuance
I säg de Gofe: "Isch doch klar,
er hät vo allem halt e paar,
Brille, Chappe, Mantel, Schueh!"
Denn gebets ämel wieder Rueh.
